ဖားပြုတ်ကေ၀တ္ထု

ဖားပြုတ်ကေတကောင်၊အုံးဘောင်စီးလျှက်၊ဖြားရီတက်တွင်၊ ချောင်းကို ၀င်၍လာလတ္တံ။ ထိုရောအခါ၊ ချောင်း ကမ်း သာတွင်၊ ပြားဇီးပင်တကိုင်းတွင်နားလျှက်၊ ပန်ဇင်းငှက်က၊ ခင်ပွန်း မိတ်ဆွေ၊ ဖားပြုတ်ကေ၊ ဇာပြည် ဇာရွာ၊ ဇာကလာဟု၊ သေချာစစ်စစ်မိန်းလတ္တံ။

ပန်ဇင်းမိန်းလေ၊ ဖားပြုတ်ကေက၊ တိုင်းပြည်မြို့ရွာ၊ လှည့်လို့လာဟု ဖြေလတ္တံ။ ထိုသို့ဖြေခါ၊ တိုင်းပြည် မြို့ ရွာ၊ ကြားခပါသည်၊ ပဇာသတင်းထူးသနည်းဟု မိန်းလတ္တံ။

ထိုသို့မိန်းခါ၊ ဖြေသည်မှာကား၊ သမုဒ္ဒရာ၊ သီတာရီမြီ၊ မိုးလီမုန်တိုင်း၊ အုံမှိုင်းမှိုင်းနှင့်၊ တော်လဲပဲ့တင်၊ ငလျှင် မြီကြီးလှုပ်လတ္တံ။ ထိုသို့လှုပ်ခါ၊ ကျွန်းဒီပါမှာ၊ ကမ္ဘာကျောက်ကြီးကွဲလတ္တံ။ ထိုသို့ကွဲခါ၊ တွင်းမှာမြောက် တောင့်၊ ခုနှစ်တောင့်လည်းကျိုးလတ္တံ။ လူလည်းလေးစု ကွဲလတ္တံ။

ထိုသို့ဖြေခါ၊ ပန်ဇင်းငှက်ကမိန်းပြန်သည်မှာ၊ အိုအိုမိတ်ဆွေ၊ ဖားပြုတ်ကေ၊ အကယ်စင်စစ်၊ ထိုသို့ဖြစ်မူ၊ ငရို့သူငါ၊ ပဇာပြုလုပ်ရမည်နည်းဟု မိန်းလတ္တံ။

ကြယ်ငါး

တစ်ခါက ပညာရှိတစ်ယောက်စွာ ပင်လယ် ကမ်းခြေ  မှာ လမ်းလျှောက် အနား ယူ ပြီးကေ ဇီ စာရီးလေ့ရှိ ပါရေ။ တစ်ရက်နိန့် ပင်လယ်ကမ်းခြီ မှာ လမ်းလျှောက်ယင်း အ၀ီးတနိန်ရာက လူတစ် ယောက် ကနိန်ရေ ပုံ သဏ္ဍါန်တစ်ခုကို ၀ေ၀၀၀ါး တွီ့လိုက်ရပါရေ။ ပညာရှိစွာ ပြုံးမိဗနာ ယင်းလူ ရှိရာဘက်ကို သသွက်ချေ လမ်း လျှောက် ထွက်လာပါရေ။ အနားကို ရောက်တေ အခါမှာ ယင်းလူစွာ လူငယ် တစ်ယောက်  ဖြစ်ပြီး ကေ က နိန်စွာ မဟုတ်မှန်း လေ့ သိလိုက်ရပါရေ။

ယင်းလူငယ်စွာရီစပ်သဲပြင်က တစ်ခုခုကို ကုန်း ကောက် ပနာ ပင်လယ်ထဲကိုဇီ သသက်ညညှာက လွှဲပစ် နိန်စွာကိုလေ့ တွီ့လိုက်ရပါရေ။ အနား ကို ရောက်တေအခါ ပညာရှိက “မင်္ဂလာပါ ငါ့တူ၊ မိုးထက်စစော စစီး ဇာလုပ်နိန်စွာပါလေး” လို့လှမ်းမိန်းလိုက်ပါရေ။

နွားချေနန့်ကျားချေဝတ္ထု

အယင်ကခါ ကျားချေတကောင်နှင့် နွားချေတကောင် အဆွေခင်ပွန်းဖြစ် ကတ်သည်။ အရေး အကြောင်း ကျလျှင် နွားချေကို ကျားချေကကူညီရန် ကတိဟိသည်။ တောခွီးများ ရောက်လာလျှင် ခလောက်ခေါက်ဖို့မှာ ထားသည်။ ခလောက်သံကြားလျှင် နွားချေဒုက္ခရောက်နီ ဗျာယ်ဖြစ် ကြောင်း ကျားချေကသိသည်။

တရက်နိခါ နွားချေက ကျားချေကို စိတ်စမ်းချင်စိတ်ပေါက်လာသည်။ ကျားချေက ငါ့ကို အဂယင့် ခင်စွာလား။ သူ့စိတ်ကိုသိချင်သည်။ မိတ်ဆွေစစ်မစစ်ကို စိတ်စမ်းကြည့်မှသိဖို့။ ထိုသို့အကြံရသည်။ ထို့ကြောင့် တရက်နိ တောစိုင်ယောင်လျှက် အစာစားနီစဉ် တောခွီးများ မလာဘဲ ခလောက် ခေါက်လိုက်သည်။ ကျားချေမှာ နွား ချေဒုက္ခရောက်ပျာယ်အထင်ဖြင့်ချက်ချင်းအပြီး ရောက်လာသည်။ သို့သော် နွားချေမှာအရိပ်ကောင်း ကောင်း ညောင်ပင်အောက်တွင် ကောက်ရိုးကို ၀မ်းတင်း အောင်စားပြီး အိပ်နီသည်။

ရီတွင်းထဲက မြင်းပုချေ

တစ်ခါကလယ်သမားတစ်ယောက်ပိုင်ရေ မြင်းပု ချေတစ်ကောင်စွာရီတွင်းပျက်တစ်ခုထဲကိုလူးကျလားပါ ရေ။ အစမှာလယ်သမားက ဘေး ပတ်ဝန်းကျင်ကို အော် ပနာ အကူ အညီ တောင်းပါရေ။နောက်ပိုင်း မှာ ဒေမြင်း ပုစွာအလုပ်လုပ်ပီးစွာလည်းကြာဗျာလ်။အသက်လေ့ကြီးနိန်ဗျာလ်အသုံးလေ့ကကောင်းဝင်ဖို့မဟုတ်ဗျာလ် ဆို ပနာမြင်းပုချေ ကို ပြန် မဆယ် ဖို့ ဆုံးဖြတ်လိုက် ပါရေ။ဘေးပတ်ဝန်း ကျင်ကလူ တိ ကို အကူ အညီ တောင်း ပနာ ရီတွင်းပျက်ကို မြေဖို့ ဖို့အနား ပတ်ဝန်းကျင် က မြေတိကို တူးပနာ ရီတွင်း ပျက် ထဲကို ပစ်ချ ခိုင်းပါရေ။

ရခိုင်ကျင်

အခန်း(၁)

ကျင်အဓိပ္ပါယ်

“ကျင်”ဝေါဟာရနှင့်ပတ်သက်၍ အမျိုးမျိုးရွီးဖွဲ့ကတ်သည် ကိုတွိရပါသည်။ ဦးရာဇ်တောင် ဘုရားသမိုင်း လင်္ကာ၌ “လောကီဘက်က၊ ဆောင်ရွက်တခန်း၊ ကျင်လက်ပန်းနှင့်၊ မီဝန်းရုပ်သီး၊ရှုမငြီးအောင်”ဟူ၍ူ ရွီးဖွဲ့ ထားသည်။ ဆယ့်နှစ်လရာသီ လင်္ကာတပိုဒ်တွင်  …“မယ်လျှင်စစ်မှာ၊ စိတ်ကြီးပျက်လို့၊ ကျင်ကိုင်လက်ပန်း၊ အခန်းခန်းကို၊ အိမ်သူအကျန်၊ မြင်ရပြန်ကေ၊ လွမ်းတော်တာရှည် ပန်းမဉ္စူကို နီပူထိုးကေ၊ ညှိုးလတ်တေ လည်း”ဟူ၍ူဖွဲ့ဆိုထား  ပြန်သည်။

လမုချောင်းဆရာကျော်မဲရွီးဖွဲ့သော မဟာဝိဟိံကရာဇဝင်လင်္ကာ (အပိုဒ်-၁၁၃၌ “ကခြေများဖြင့်၊ တီး ကာရစ် မြည်၊စည်ငါးမည်တည်း၊ သံရှည်ဟစ်ကြွေး၊ စုရုံးဝေးလျှက်၊ လက်ပွဲကျယင်၊ လုံးထွီးကျင်၍” ဟူ၍လည်း ကောင်း မန္တလေးဝိဇ္ဇာသိပ္ပံတက္ကသိုလ်ပါမောက္ခချုပ် ဆရာကြီးဦးကျော်ရင်သည် ရန်ကုန်တက္ကသိုလ်  နှစ်ပတ် လည်မဂ္ဂဇင်း (၁၉၅၈-၅၉)၊ လုပ်သားပြည်သူ့နိစဉ်သတင်းစာ(၂၄-၈-၆၄) တွင် ကျင်နှင့်ပတ်သက် ဆောင်းပါး များကို ရွီးသားခရာ- “ကျင်ဟူသည်မှာ ကျားနှင့်ယင် ဝေါဟာရနှစ်လုံး ပေါင်းစပ်ဖြစ်ပေါ်လာရကြောင်း၊ “ကျား ယင်၊ ယင်-ကျား” ကစပ်နည်းကိုအခြီခံ၍ ကျင်ဖြစ်ပေါ်လာရကြောင်း ဆိုထားသည်။ “ကျားယင်” ကစပ်နည်း၊ ကျားက ယင်ကို အုပ်ဖမ်းလိုက်၊ ယင်က ယှောင်ပြီးလိုက်နှင့် ယင်အကောင်နှစ်ဆယ် ကို ကျားနှစ်ကောင်က အနိုင် လိုက်ဖမ်းရန်အကွက် ရွှိကစပ်နည်းကိုအခြီမှီပြီး ကျင်သန်နှစ်ဦး ဖမ်း လိုက်၊ ခံလိုက်၊ ပစ်ချလိုက်နှင့် မြီသို့ ကျအောင် ကစပ်ရသော နည်းအတတ်ပညာ ဟူ၍ ယှင်းပြထားသည်။

သုံးဆယ်သီမင်းဝတ္ထု

အယင်ကခါ မြောက်ဥဘုရင်တစ်ပါး လက်ထက်နိဂုံးဇနပုဒ်တစ်ခုမှာ လင်မယားတစ်အိမ်ထောင် ဟိသည်။ ဆင်းရဲ ရေအတွက် ဆန်ဖွပ်၊ ရီခပ်၊ ထင်းခြွီ၊  အငှားလုပ်စားနိန်ကတ်ရသည်။ လင်ကပျင်း လို့အလုပ်မလုပ်။ မယားလုပ်စွာကိုထိုင်စားသည်။ မယားလုပ်ရာမှာ အပျင်းပြေ ကြက်နှင်၊ ယင် လိုက်လုပ်သည်။ တရက်နိ မယားဆန်ဖွပ်နိန်ခါ ယင်တိဆန်မှုန့်လာ နားစားကတ်သည်။ ငပျင်းထွေ လည်း ရှောက်ခြမ်း တစ်စိတ်နန့် ယင်တိ ကိုလိုက်သတ်သည်။

ယင်းပိုင်နန့် ယင်သုံးဆယ်ရလို့ မယားကို ” ငါ ယင်သုံးဆယ်ကို သတ်လိုက်ဗျာလ် ကြည့်စမ်တချက်” လို့ ဘောရိပြောသည်။ ယေခါမယားသည်က ” သုံးဆယ်သီမင်း အစစ်မနားယေ”  လို့ပြန်ပြောသည်။

ယင်းနိကပင် မယားလည်း လင်ကို အရွဲ့တိုက်ဗျာလ် ”ငါ့လင်ယင်သုံးဆယ်ကိုသတ်နိူင်ရေ၊အေပိုင်တော် ရေမ ဟုတ်၊သုံးဆယ်သီမင်းအစစ်”လို့လူတွီ့တိုင်းလျှောက်ပြောသည်။ယင်းပိုင်နန့်သူ့ကို”သုံဆယ်သီမင်း”ဟု နာမည် တွင်လာသည်။ ကြာသောအခါ သူ့သတင်းသည် ဘုရင့်နားထိ ပေါက်ကြားလားသည်။

ငါ့ခွီးရီထက်မှာ လမ်းလျှောက်တတ်တေ

တစ်ခါက အမဲလိုက်မုဆိုးတစ်ယောက်မှာငှက်ဖမ်းတတ်တေခွီးချေတစ်ကောင်ရှိပါရေ။ယင်းခွီးထူးခြား ချက်က ရီထက်မှာလမ်းလျှောက်တတ်စွာဘာ။တစ်ရက်နိန့်ခါမုဆိုးကသူ့မှာအဖိုးဖြတ်မရရေခွီးချေတစ်ကောင်ရှိ ရေဆို စွာကို ပြချင်လို့ သူငယ်ချင်းတစ်ယောက်ကို အမဲ လိုက်ဖို့ ဖိတ်ခေါ်လိုက်ပါရေ။ အမဲလိုက် ယင်း ရီထဲက ရီဘဲ တိကို သေနတ် နန့် လိုက်ပစ်ကတ်ပါရေ။ ပစ်လို့ ကျရေ ဘဲတိကို ခွီးချေက ရီထက်က ဗြီးဗ နာဇီ  လိုက် ကောက်ပါရေ။မုဆိုးက သူငယ်ချင်း ချီးမွမ်း ပြောစကားကို နားစွင့် နိန်ကေလည်း လုံးဝ မကြားရပါ။ နောက် ဆုံးမနိန်နိုင်လို့ ” အဝေ  သူငယ်ချင်း။ ငါ့ခွီးမှာ ဇာထူး ခြားချက် ရှိလေ ၊ မင်းသ တိ ထား မိလာ။” လို့လှမ်းမိန်း လိုက်ပါရေ။ ယင်းခါ သူငယ်ချင်းက ” အေး ဝေး   သူငယ်ချင်း။ မင်းခွီး ရီမကူး တတ်စွာကို ငါသတိထား မိပါရေ” လို့ပြန်ပြောလိုက်ပါရေ။

ရခိုင်ရိုးရာ ငစည်ရှာ ပြဇာတ်အကြောင်း

ရခိုင်ရိုးရာ ငစည်ရှာရာဇ၀င်ပြဇာတ်ကြီးသည် ရခိုင်ပြည်နယ်တွင် ထင်ရှားသောပြဇာတ်ဖြစ်သည်။ ရခိုင်ယဉ် ကျေးမှုကို အရေးပါ အရာရောက်အောင် ထောက်ပံ့ပေးသော ပြဇာတ်တစ်စောင်လည်း ဖြစ်သည်။ ယခု လက်ရှိအချိန်အခါတွင် ငစည်တတ်များလည်း ရှားပါး ပျောက်ကွယ်နေချိန်ဖြစ်၍ မူရင်းဇာတ်အတိုင်း အနှစ် သာရပြည့်ဝသော ပြဇာတ်အဖြစ် ကပြနိုင်သူ ရှားပါးနေပြီဖြစ်သည်။ နဂိုမူလမှာလည်း ပျက်စပြု နေပြီဖြစ် သည်။ နဂိုမူရင်းဇာတ်ချင်းသည်လည်း နောက်မကြာမီတွင် ပျောက်ကွယ်သွား နိုင်ပေသည်။ ထို့ကြောင့် ယဉ် ကျေးမှုတစ်ရပ် မကွယ်ပျောက်ရအောင် ပြန်လည် တင်ပြရခြင်း ဖြစ်သည်။

     
ငစည်ရာဇ၀င် ပြဇာတ်ကို စီစဉ်တင်ပြသူမှာ မင်းဟရီလက်ထက် အမှုထမ်းသော အမတ်ကြီး ဦးဒိုးဝေ ဖြစ်သည်။ အခြားတစ်ဦး ဦးဒိုးဝေဆိုလျှင် ရခိုင်ပြည်နယ်၌ သာမက မြန်မာပြည်တလွှားကပင် ရာဇ၀င် ဆရာ အဖြစ် သိကြပါသည်။ သက္ကရာဇ် ၁၁၂၆ ခုနှစ်တွင် နန်းတက်သော အဘယမဟာရာဇာ လက်ထက် တွင် အမတ်ကြီးအဖြစ်အမှုထမ်းစဉ် လေးဆယ့် ရှစ်အင်္ဂါ ရှိသော ရာဇ၀င်ကျမ်းတစ်စောင်ကို ပြုစုခဲ့သည်။ ဤနေ ရာ၌ ပေရွက်(၁၂) ရွက်ကို တစ်အင်္ဂါ ဟု ခေါ်သည်။ဤရာဇ၀င်ကြီး၌ (၄၈)အင်္ဂါဆိုလျှင် ပေရွက်ပေါင်း (၅၇၆) ရွက် ရှိသည်။ ၄င်း ရာဇ၀င်ကို ဒိုးဝေရာဇ၀င် ဟုခေါ်သည်။ ရာဇ၀င်ဆရာ အဖြစ် လည်းကောင်း ၊ပညာရှိ အမတ်အဖြစ်လည်းကောင်း သိကြသော ဦးဒိုးဝေမှာ မြောက်ဦးခေတ်နောက်ပိုင်းမှ ထင်ရှားလာသူ ဖြစ်သည်။ စစ်စစ် ဤဦးဒိုးဝေမှာ ပြဇာတ်ရေးသူမဟုတ် ရာဇ၀င်ဆရာ တစ်ယောက် သာဖြစ်သည်။

သူငယ်ချင်း(၃)

ကျီဆန်မိုးတိရွာနိန်ရေ ဒုတိယကမ္ဘာစစ်ရခိုင်ပြည်ရှေ့တန်းတစ်နိန်ရာမှာအင်္ဂလိပ်မဟာမိတ်ဖက်က ၀င်တိုက် နိန်ရေ စစ်သားတစ်ယောက်ရေ ရှေ့ မီတာ ၁၀၀ အကွာကကတုပ်ကျင်းမှာ ငယ်သူငယ်ချင်း ဗုံးကျပနာ လဲပြို လားစွာကို တွီ့လိုက်ရပါရေ။ ခေါင်းထက်က တ၀ီဝီပျံနိန်ရေ ကျည်ဆံတိကို ဂရုစိုက် မနိန်ဘဲ ကတုပ် ကျင်းနှစ် ခုကြားက မရဏကွင်းပြင်ကို ဖြတ်ပြီးကေ သူငယ်ချင်းကို လားယူဖို့ အထက်ကပ္ပတိန်ကို တောင်းဆို လိုက်ပါ ရေ။

ကပ္ပတိန်က” လားစွာတော့ လားလို့ရပါရေ။ ယေကေလည်း စွန့်စားရကျိုးနပ်ဖို့ မထင်ပါကာ။ မင်းသူငယ်ချင်း က အေလောက်ဆိုကေ အသက်ရှိဖို့မဟုတ်ပါဗျာလ်။ အသက်မရှိရေ ခန္ဓာချေ တစ်ခုအတွက် မင်းအသက်ကို မစွန့်သင့်လို့ ထင်ပါရေ” လို့ ပြောလိုက်ပါရေ။

ကပ္ပတိန်စကားကို နားမထောင်ဘဲ ယင်းစစ်သားစွာ မရဏကွင်းပြင်ကို ခခက်ခခဲ ဖြတ်လားခပါရေ။ သူငယ် ချင်းအလောင်းကို ပက်ခုံးထက်မှာ တင်ပနာ ဒဏ်ရာဒဏ်ချက် ဗရပွနန့် ပြန်ရောက်လာရေ ယင်း စစ်သားစွာ ကတုပ်ကျင်းကို ပြန်ရောက်စွာနန့် ကိုယ့်စွာကိုယ် မထိန်းနိုင်ဘဲသတိမိလဲကျလားပါရေ။ကပ္ပတိန်က ချက်ချင်း ပြုစုကုသခိုင်းပနာသတိရလာရေခါ ”ကိုင်းငါပြောရေမနား လားရကျိုးနပ်ဖို့မဟုတ် ဆိုစွာ ကိုလေ။ မင်းသူငယ် ချင်း အသက်ကို မကယ်နိုင်ရေအပြင် မင်းမှာရာ ဒဏ်ရာတိ ဗရပွ ရကျန်ခယင့် ” လို့ပြောလိုက်ပါရေ။

ပန်းတံမင်းသားနန့်သံတွဲမင်းသမီးဝတ္ထု

ရခိုင်ရိုးရာ၊ ဖြစ်ခြင်းရာကို၊ ကျွန်ဆရာမှာ၊ ပြောပြမည်။ ထီးက ခရိုင်၊ မင်းထိုင်ပြည့်ဖြိုး၊ ပြည်ပဂိုး။ ပဂိုး မင်းသ မီး၊ ပြည်ကိုခွဲခါ၊ နှမကားတောင်၊ မောင်ကားမြောက်ဦး၊ မြစ်မင်းဂဂါ၊င်္သီတာတရိုး၊နှမနီကေ၊သံတွဲမြို့၊ မောင်ရို့ နီကေ၊ ရခိုင်မြို့။ ရခိုင်မင်း သား၊ နန်းထက်ဖွား၊ လှငြားတင့်တယ်၊ မိခင်ဝမ်းမှာ၊ သန္ဓေ တည်။ ကိုးလကပင်၊ ကိုယ်ဝန်ကြင်၊ ခမည်းလွန်းတင်၊ ဖဘုရင်၊ ဘုရင်လွှတ်လွှတ်၊ ရခိုင်မြို့မှာ၊ မကြံတတ်။ ကျွန်မပြည့်ကူ၊ ကိုယ်ယူ ကိုယ်မ၊ သနားစဖွယ်၊ သျှင်မ၀မ်းကို၊ စမ်းကြည့် ရေခါ၊ ချစ်သျှင်မမှာ၊မိမ္မမဖြစ်၊ယောင်္ကျားဖြစ်မည်။ ယောင်္ကျား ဖြစ် လည်း၊ အရှင်မမွီး၊ ချစ်သျှင်မမှာ၊ အသီရာမွီးမည်၊ ဇောင်လည်း လေ၊ ဇောင် လည်းအလို၊ ပြည့်ကျွန်မမှာ၊ ဇမ်းတိုက် ဆိုရေ။

ဇောင်စကားကို၊ ကြားရေနိက၊ ရခိုင်မင်းပင်၊ အသျှင်တရီး၊ နန်းတောင်ညာမှာ၊ ကြောင်းကြကြီးရေ။ ငါ့မှာ ဟိငြား၊ ရွှီက လောင်ကိုင်၊ ဇကိုင်ကြီး၊ မတ်ကြီးမနီ၊ ငါ့အနားတွင်၊ ခုရောက်စီ။ ငွေကလောင်ကိုင်၊ ဇကိုင်ကြီး၊ မှုးကြီးမနီ၊ ငါအနားတွင်၊ ခု ရောက်စီ။ ရွှီကလောင်ကိုင်၊ ဇကိုင်ကြီး၊ မတ်ကြီးလေးသွယ်၊ နန်းတောင်ညာမှာ၊ ရောက်လာရေ။ ငွေကလောင်ကိုင်၊ ဇကိုင်ကြီး၊ မှုးကြီးလေးသွယ်၊ နန်းတောင် ညာမှာ၊ ရောက်လာရေ။ ရွှီက လောင်ကိုင်၊ ဇကိုင်ကြီး၊ မတ်ကြီးမနီ၊ ကံ့ကူသည်နှင့်၊ ၀လံသည်ကို၊ ရခိုင်မြို့မှာ၊ ခုရှာခီ။